Psa 63 | Geez | STEP | ስምዐኒ ፡ እግዚኦ ፡ ጸሎትየ ፡ ዘሰአልኩ ፡ ኀቤከ ፤ እምትሕዝብተ ፡ ጽላኢ ፡ አድኅና ፡ ለነፍስይ ።

Psalms 63

ፍጻሜ ፡ መዝሙር ፡ ዘዳዊት ።
1 ስምዐኒ ፡ እግዚኦ ፡ ጸሎትየ ፡ ዘሰአልኩ ፡ ኀቤከ ፤
እምትሕዝብተ ፡ ጽላኢ ፡ አድኅና ፡ ለነፍስይ ።
2 ወሰውረኒ ፡ እምዕሌቶሙ ፡ ለእኩያን ፤
ወእምብዝኆሙ ፡ ለገበርተ ፡ ዐመፃ ።
3 እለ ፡ አብልኁ ፡ ልሳኖሙ ፡ ከመ ፡ አርዌ ፡ ምድር ፤
ወወሰቁ ፡ ቀስቶሙ ፡ ለገቢረ ፡ መሪር ።
ከመ ፡ ይቅትልዎ ፡ ለንጹሕ ፡ በጽሚት ፤
4 ግብተ ፡ ይነድፍዎሙ ፡ ወኢይፈርሁ ።
ወአጽንዑ ፡ ሎሙ ፡ ነገረ ፡ እኩየ ፡
5 ወተማከሩ ፡ ይኅብኡ ፡ ሎሙ ፡ መሥገርተ ፤
ወይቤሉ ፡ አልቦ ፡ ዘይሬእየነ ።
6 ወኀሠሥዋ ፡ ለዐመፃ ፡ ወኀልቁ ፡ እዝነ ፡ ይፈትኑ ፡ ወይወጥኑ ፤
7 ወይበውእ ፡ ሰብእ ፡ በልብ ፡ ዕሙቅ ፤
ወይትሌዐል ፡ እግዚአብሔር ።
8 ከመ ፡ ሐጸ ፡ ደቂቅ ፡ ኮነ ፡ መቅሠፍቶሙ ።
ወደክመ ፡ ለሳኖሙ ፡ በላዕሌሆሙ ፡
9 ወደንገፁ ፡ ኵሎሙ ፡ እለ ፡ ርእይዎሙ ።
ወፈርሁ ፡ ኵሉ ፡ ሰብእ ፡
10 ወነገሩ ፡ ግብረ ፡ እግዚአብሔር ፤
ወአእመሩ ፡ ምግባሮ ።
11 ይትፌሣሕ ፡ ጻድቅ ፡ በእግዚአብሔር ፡ ወይትዌከል ፡ ቦቱ ፤
ወይከብሩ ፡ ኵሎሙ ፡ ርቱዓነ ፡ ልብ ።